Halastjarna og norðurljós yfir Íslandi
18. mars 2013
-
Halastjarnan PanStarrs og norðurljós. Mynd: Gísli Már Árnason
Í síðustu viku birtist halastjarnan PanStarrs á stjörnuhimninum yfir Íslandi. Þótt halastjarnan sé aðeins daufari en vonast var eftir, hafa stjörnuáhugamenn fylgst grannt með og margir náð fínum myndum af henni. Sunnudagskvöldið 17. mars var himininn einstaklega glæsilegur skreyttur dansandi norðurljósum, halastjörnu og mánaðarlegu stefnumóti tunglsins og Júpíters.
Mynd vikunnar hér að ofan tók Gísli Már Árnason, félagsmaður í Stjörnuskoðunarfélagi Seltjarnarness þann 17. mars . Halastjarnan sést vel á myndinni í ljósaskiptunum innan um norðurljósin. Haddurinn er mest áberandi en daufur halinn liggur skáhallt upp frá honum í stefnu frá sólinni.
Tæplega 300 manns komu saman í Gróttu á Seltjarnarnesi þar sem Stjörnuskoðunarfélag Seltjarnarness stóð fyrir stjörnuskoðun. Þar tók Hilmar Þór Guðmundsson þessar myndir:
 |
| Vaxandi tungl í nautsmerkinu og norðurljós sunnudagskvöldið 17. mars. Bjarta stjarnan fyrir ofan tunglið er Júpíter en lengra til hægri sést Sjöstirnið vel. Í neðra hægra horninu sést halastjarnan PanStarrs. Mynd: Hilmar Örn Guðmundsson |
 |
| Stjörnuskoðunarfélag Seltjarnarness stóð fyrir stjörnuskoðun við golfskála golfklúbbsins Ness. Þangað komu um 300 manns. Mynd: Hilmar Örn Guðmundsson |
Fólk kom líka saman í Vestmannaeyjum, bæði á föstudags- og sunnudagskvöld. Þessa mynd tók Óskar Elías Sigurðsson föstudagskvöldið 15. mars af halastjörnunni PanStarrs á vesturhimninum.
 |
| Halastjarnan PanStarrs (vinstra megin) séð úr Vestmannaeyjum. Horft er í vesturátt: Lengst til vinstri sést halastjarnan í ljósaskiptunum en lengra til hægri eru smáeyjarnar Hæna, Hani og Hrauney. Mynd: Óskar Elías Sigurðsson |
 |
| Halastjarnan PanStarrs. Mynd: Óskar Elías Sigurðsson |
 |
| Norðurljósin og tunglið lýsa upp hafið við Vestmannaeyjar. Bjarta stjarnan fyrir ofan tunglið er Júpíter. Mynd: Óskar Elías Sigurðsson |
Um 20 manns komu saman í halastjörnuskoðun á Þingeyri sunnudagskvöldið 17. mars undir leiðsögn Jón Sigurðssonar, stjörnuáhugamanns. Jón segir: „Tók smá tíma að finna hana [halastjörnuna] en eftir að hún var fundin setti ég tölvustýrða sjónaukann á hana og týndum henni ekki eftir það. Þegar myrkur var orðið meira sáu hana allir með berum augum, stórir sem smáir. Skemmtileg upplifun fyrir alla.“
 |
| Halastjarnan PanStarrs í ljósaskiptunum við Arnarnúp, séð úr Dýrafirði. Mynd: Jón Sigurðsson |
Jón náði einnig þessari mynd af halastjörnunni í gegnum sjónauka:
 |
| Halastjarnan PanStarrs. Ef þessi mynd er borin saman við mynd Óskars Elíasar Sigurðssonar fyrir ofan, sést greinilega að halastjarnan hefur færst milli þess sem myndirnar voru teknar. Mynd: Jón Sigurðsson |
Matthías Ásgeirsson tók svo þessa stórkostlegu mynd af dansandi norðurljósum innan um Vetrarþríhyrninginn með Óríon í broddi fylkingar undir vökulu auga tunglsins og Júpíters.
 |
| Mynd: Matthías Ásgeirsson |
Halastjarnan PanStarrs er enn sýnileg á himninum. Nauðsynlegt er að nota handsjónauka til að finna hana og góðan skammt af þolinmæði. Horfðu lágt á vesturhimininn um klukkustund eftir sólsetur og skannaðu himininn með handsjónaukanum. Þú ættir að koma auga á fyrirbæri sem líkist stjörnu en hefur augljósan hala.
Sjá má fleiri glæsilegar myndir á Facebook síðu Stjörnufræðivefsins.
Við þökkum þeim sem sendu okkur myndir kærlega fyrir!
Höfundur: Sævar Helgi Bragason
Ummæli