Myndbreyting Messier 8

16. maí 2011

  • Lónþokan, Messier 8, NGC 6523, Bogmaðurinn, Ljómþoka
    Lónþokan eða Messier 8 er ljómþoka í stjörnumerkinu Bogmanninum

Þessi mynd Hubblessjónaukans af Messier 8 er bæði litrík og súrrealísk, ekki ósvipuð málverki Salvadors Dalí. Þessi fæðingarstaður stjarna er í stjörnumerkinu Bogmanninum og er einnig betur þekktur sem Lónþokan.

Nafn þokunnar á vel við og er lýsandi fyrir fegurð hennar. En þótt lón lýsi mikilli rósemd er ekkert rólegt við þá háorkugeislun sem veldur því að skýið lýsist upp. Í innviðum þokunnar leynast massamiklar stjörnur sem gefa frá sér mikla útfjólubláa geislun sem mótar þokuna sérkennilega og veldur því að gasið jónast svo það lýsir. Úr verður fyrirbæri í um það bil fjögur til fimm þúsund ljósára fjarlægð sem sést með berum augum á heiðskíru kvöldi.

Frá því Messier 8 uppgötvaðist árið 1747 hefur hún verið ljósmynduð og rannsökuð á mörgum mismunandi bylgjulengdum. Með innrauðum nemum má gægjast djúpt í þokuna og rannsaka fyrirbærin sem þar leynast. Engin slík fyrirbæri sjást þó á þessari mynd enda tekin í sýnilegu ljósi og er óneitanlega ein af fallegri myndum sjónaukans.

Messier 8 er mjög stór — um 140 x 60 ljósár. Til að setja það í samhengi við sólkerfið okkar, þá nær braut Neptúnusar aðeins fjórar ljósklukkustundir frá sólu. Á myndinni hér að ofan sést einungis lítið svæði við miðju þokunnar en sjá má svæðin í kring, sem Hubble ljósmyndaði fyrir sömu rannsókn, hér.

Þessi mynd er sett saman úr myndum sem teknar voru með Advanced Camera for Surveys á Hubblessjónaukanum. Myndir sem sýna rafað vetni voru litaðar rauðar, myndir sem sýna jónað nitur voru litaðar grænar og myndir teknar í gegnum gula síu voru litaðar bláar. Heildarlýsingartími nam tæpri klukkustund. Bláhvíta ljósið sem sést neðarlega til vinstri er tvístrað ljós frá stjörnu rétt fyrir utan sjónsviðið sem spannar 3,3 x 1,7 bogamínútur af himinhvelfingunni.

Mynd vikunnar kemur frá Hubble/ESA og NASA

Um fyrirbærið

  • Nafn: Lónþokan / Messier 8

  • Tegund: Ljómþoka / rafað vetnisský

  • Fjarlægð: 4-5.000 ljósár
  • Stjörnumerki: Bogmaðurinn

Myndir

Tengt efni

Ummæli