Messier 49

Sporvöluþoka í Meyjunni

  • Messier 49, sporvöluþoka, Meyjan
    Sporvöluþokan Messier 49 í Meyjunni. Mynd: NASA/ESA/WikiSky
Helstu upplýsingar
Tegund: Sporvöluþoka
 Gerð: E4
Stjörnulengd:
 12klst 29mín 46,7s
Stjörnubreidd:
 +08° 00′ 02"
Fjarlægð:
 60 milljón ljósár
Rauðvik:
 z = 0,003326
Sjónstefnuhraði:
 997 ± 7 km/s
Sýndarbirtustig:
 +9,5
Stjörnumerki: Meyjan
Önnur skráarnöfn:
 NGC 4472, Arp 134

Franski stjörnufræðingurinn Charles Messier uppgötvaði þokuna þann 19. febrúar 1771. Hún var fyrsta vetrarbrautin sem fannst í Meyjarþyrpingunni.

Messier 49 er í um 60 milljón ljósára fjarlægð frá jörðinni. Hún er með björtustu vetrarbrautum Meyjarþyrpingarinnar — safni meira en 1.300 vetrarbrauta — og ein af risasporvölunum sem í henni eru. M60 er hátt í 200.000 ljósár í þvermál, tvöfalt stærri en vetrarbrautin okkar og inniheldur líklega yfir trilljón stjörnur. Á sveimi um hana gætu verið í kringum 6000 kúluþyrpingar.

Messier 49 er 134. fyrirbærið í skrá bandaríska stjörnufræðingsins Haltons Arp yfir sérkennilegar vetrarbrautir sem kom út árið 1966. Í skrá Arps eru 338 vetrarbrautir sem eru að renna saman eða gagnverka hvor við aðra.

Á himninum

Messier 49 sést ágætlega frá Íslandi en best er að skoða hana þegar Meyjarmerkið er í suðri að áliðinni nóttu seint í mars og snemma í apríl. Engin björt eða áberandi stjarna er mjög nálægt M49 svo nauðsynlegt er að nota stjörnukort af Meyjunni til að finna hana.

Sýndarbirtustig Messier 49 er +9,5 svo nota þarf stjörnusjónauka til að skoða hana. Í gegnum átta tommu sjónauka við um það bil 100-falda stækkun sést bjartur þokublettur sem dofnar til jaðranna.

Tengt efni

Heimildir

Hvernig vitna skal í þessa grein

  • Sævar Helgi Bragason (2012). Messier 49. Stjörnufræðivefurinn. http://www.stjornuskodun.is/stjornuskodun/djupfyrirbaeri/messierskrain/messier-49 (sótt: DAGSETNING).