Messier 67

Lausþyrping í Krabbanum

Þýski stjörnufræðingurinn Johann Gottfried Koehler sá þyrpinguna fyrstur svo vitað sé fyrir árið 1779 en margt bendir til að hann hafi getað greint sundur einstakar stjörnur í henni. Charles Messier fann þyrpinguna sjálfur og lýsir henni í skrá sinni þann 6. apríl 1780 sem þyrpingu smárra stjarna í þokumóðu.

Messier 67 er í hópu elstu lausþyrpinga sem fundist hafa og er langelst af þeim lausþyrpingum sem finna má í skrá Messiers. Talið er að þyrpingin sé um 3-4 milljarða ára gömul sem er fáheyrt um lausþyrpingar sem sundrast með tímanum. Stjörnufræðingar spá henni langlífi en þeir hafa reiknað út að stjörnurnar geti haldið hópinn í um 5 milljarða ára til viðbótar sem er svipaður tími og sólin okkar á eftir ólifaðan.

Stjörnur þyrpingarinnar eru nokkuð yngri en sólin okkar en hafa svipaða efnasamsetningu. Fundist hafa um 100 stjörnur í Messier 67 sem svipar til sólarinnar okkar en alls er talið að um 500 stjörnur séu í þyrpingunni sem í heild eru um 1.400 sólmassar.

Á himninum

Messier 67 er í um 2.600 ljósára fjarlægð frá sólkerfinu. Sýndarbirtustig hennar er +6,1 svo þyrpingin sést aðeins með berum augum nema við bestu mögulegu stjörnuskoðunaraðstæður. Hægt er að koma auga á hana með handsjónauka og stjörnusjónauka nærri stjörnunni alfa í suðausturhluta Krabbamerkisins (sjá stjörnukort af Krabbanum). Hún er falleg í meðalstórum sjónauka og skera 20-30 björtustu stjörnurnar sig úr skaranum.

Tengt efni

• Stjörnuþyrpingar

• Messierskráin

Heimildir

1. Messier 67, SEDS Messier pages

2. en.wikipedia.org/wiki/Messier_67

Hvernig vitna skal í þessa grein

• Sverrir Guðmundsson og Sævar Helgi Bragason (2012). Messier 67. Stjörnufræðivefurinn. http://www.stjornuskodun.is/stjornuskodun/djupfyrirbaeri/messierskrain/messier-67 (sótt: DAGSETNING).